14 Qershor – Dita Botërore e Dhurimit të Gjakut

Dita Botërore e Dhurimit të Gjakut, që shënohet çdo vit më 14 qershor, ka për qëllim të rrisë vetëdijen për nevojën e gjakut të sigurt dhe të shprehë mirënjohje për të gjithë dhuruesit vullnetarë të gjakut në mbarë botën.
Kjo ditë është edhe një mundësi për të nderuar të gjithë ata që me vetmohim dhe humanitet kontribuojnë në shpëtimin e jetëve njerëzore.

Gjendja e dhurimit të gjakut në vend:

Në Republikën e Maqedonisë së Veriut, nevojat për gjak janë të vazhdueshme. Çdo vit sigurohen rreth 55,000 njësi gjaku, mjaftueshëm për të mbuluar nevojat themelore të sistemit shëndetësor.
Megjithatë, angazhimi i qëndrueshëm i dhuruesve vullnetarë dhe pa pagesë është thelbësor – veçanërisht i të rinjve.

Sipas të dhënave nga Kryqi i Kuq i RMV-së, më shumë se 70% e dhuruesve janë të rregullt, ndërsa mbi 40% prej tyre dhurojnë gjak më shumë se dy herë në vit.
Çdo njësi e dhuruar gjaku mund të shpëtojë deri në tre jetë.

Roli i Kryqit të Kuq

Kryqi i Kuq i Republikës së Maqedonisë së Veriut, në bashkëpunim me Institutin për Mjekësi Transfuzive, organizon qindra aksione të dhurimit të gjakut çdo vit, veçanërisht në bashkëpunim me shkolla, fakultete, kompani dhe komuna.

Qëllimi ynë është të nxisim vetëdijen – veçanërisht te brezat e rinj – për rëndësinë e dhurimit të rregullt dhe vullnetar të gjakut.

Të jemi humanë. Të jemi solidarë.
Secili prej nesh mund të jetë hero për dikë tjetër.