Garë Rajonale e Ndihmës së Parë

Më 17 maj 2025, në organizim të Organizatës Komunale të Kryqit të Kuq Qendër, u mbajt Gara Rajonale e Ndihmës së Parë për Rajonin 2, me temën: „Ndihma e parë në mjedisin shkollor“.

Të rinjtë nga komuna të ndryshme, përmes sfidave teorike dhe praktike, jo vetëm që garuan, por krijuan ura solidariteti, mirëkuptimi dhe përgjegjësie ekipore. Çdo hap i tyre, çdo përgjigje e saktë, ishte një akt kujdesi ndaj tjetrit – një kujtesë se jeta nuk ka prova, dhe ndihma duhet të jetë e shpejtë, e saktë dhe me zemër.

Vendin e parë e fitoi ekipi i Organizatës Komunale të Kryqit të Kuq Qendër – simbolikisht dhe në thelb, ata u bënë zëdhënës të humanizmit dhe shembull për të tjerët. Por, në një garë si kjo, fitorja e vërtetë i takon të gjithëve që u përkushtuan, mësuan dhe zgjodhën të jenë aty për tjetrin – kur është më së shumti e nevojshme.

Përmes ngjarjeve të tilla, Kryqi i Kuq nuk bën vetëm edukim – ai ndërton karakter. I frymëzon të rinjtë të bëhen roje të njerëzores, të gatshëm ta vënë dijen në shërbim të jetës. Dhe në një botë ku shpesh harrojmë njëri-tjetrin, kjo mision është më e rëndësishme se kurrë.