“Mendoni edhe për ne”

Dita Botërore e Ushqimit shënohet çdo vit më 16 tetor dhe promovon ndërgjegjësimin për urinë dhe veprimin për të ardhmen e ushqimit, njerëzve dhe planetit. Në këtë ditë, më shumë se 150 vende bashkohen për të ngritur vetëdijen për problemet që lidhen me varfërinë dhe urinë. Sipas të dhënave më të fundit statistikore për varfërinë në botë, rreth 9.1% e popullsisë së botës është e prekur nga uria. Kjo përfaqëson më shumë se 735 milionë njerëz që nuk kanë ushqim të mjaftueshëm për të pasur një jetë të shëndetshme dhe aktive.

Në vendin tonë, sipas të dhënave të Entit Shtetëror të Statistikës për vitin 2022, shkalla e varfërisë është 22.9%. Nën pragun e varfërisë jetojnë 451.900 persona.

Kryqi i Kuq i Republikës së Maqedonisë së Veriut edhe këtë vit përfshihet në aksionet globale për luftën kundër urisë duke organizuar fushatën „Mendoni edhe për ne“ në kuadër të “Javës për luftën kundër urisë”, e cila do të realizohet nga 16 deri më 22 tetor përmes organizatave komunale të Kryqit të Kuq dhe Kryqit të Kuq të qytetit të Shkupit. Me këtë fushatë, ashtu si edhe me shumë aktivitete të tjera humanitare, Kryqi i Kuq jep kontribut në përpjekjet e përgjithshme që ndërmerren në vend për uljen e varfërisë dhe përjashtimit social të qytetarëve.

Në kuadër të fushatës organizohen aksione humanitare për sigurimin e donacioneve në para dhe ushqim, në bashkëpunim me odat ekonomike në Republikën e Maqedonisë së Veriut, si dhe me përkrahjen e kompanive, institucioneve edukativo-arsimore, shoqatave të qytetarëve dhe vetë qytetarëve.

Donacionet mund të paguhen në llogarinë e Fondit të Solidaritetit të Kryqit të Kuq të RMV-së:
300000001327966
Numri tatimor: 4030984271620
AD Komercijalna Banka Shkup
me qëllim për fushatën „Mendoni edhe për ne“
si dhe 100 denarë përmes numrave të telefonisë mobile:
070/075/077 143 400

Mjetet e dhuruara nga aksionet humanitare do të përdoren për sigurimin e ushqimit për ndihmë të grupeve të cenueshme të popullsisë në komunitetet në vend.