Punëtoria PRE

Në periudhën nga 27 deri më 29 tetor 2025, në qendrën Solferino në Strugë, u mbajt punëtoria për PER – Përgatitje për Reagim Efektiv ndaj Fatkeqësive e Kryqit të Kuq të Republikës së Maqedonisë së Veriut, me mbështetjen e Federatës Ndërkombëtare të Kryqit të Kuq dhe Gjysmëhënës së Kuqe.

Punëtoria u organizua me qëllim të rishikimit dhe përmirësimit të planit ekzistues të punës në kuadër të dokumentit PRE, si dhe forcimit të kapaciteteve të organizatës për përgatitje dhe reagim efektiv ndaj fatkeqësive dhe situatave të krizës në nivel kombëtar dhe lokal.

Në punëtori morën pjesë të punësuar nga zyra qendrore e Kryqit të Kuq të RMV-së, si dhe përfaqësues nga organizatat komunale të Kryqit të Kuq, të cilët kontribuan në mënyrë aktive në analizën e kapaciteteve ekzistuese, identifikimin e mangësive dhe përcaktimin e prioriteteve për aktivitetet e ardhshme.

Fasilitatorë ishin përfaqësues nga Zyra Rajonale e Federatës Ndërkombëtare të Shoqatave të Kryqit të Kuq dhe Gjysmëhënës së Kuqe dhe koordinatori për fatkeqësi pranë Kryqit të Kuq të RMV-së. Punëtoria u zhvillua në mënyrë interaktive, pjesëmarrëse dhe praktikisht të orientuar, me kombinim të sesioneve plenare dhe punës në grupe tematike.

Si rezultat i procesit, u përgatit një mjet PRE sipas modelit standard të Federatës Ndërkombëtare, me rekomandime dhe aktivitete konkrete për përmirësimin e sistemit të përgatitjes dhe reagimit. Ky mjet përfaqëson një instrument kyç për shoqatat kombëtare, duke mundësuar një qasje sistematike në vlerësimin e kapaciteteve, përcaktimin e prioriteteve dhe planifikimin e ndërhyrjeve afatgjata. Procesi PER jo vetëm që kontribuon në forcimin e gatishmërisë operative të organizatës, por gjithashtu krijon bazën për zhvillimin e iniciativave të reja projektuale dhe partneriteteve me donatorë, institucione dhe bashkëpunëtorë të tjerë.

Rezultatet dhe prioritetet e përcaktuara gjatë kësaj punëtorie do të shërbejnë si bazë për identifikimin e programeve dhe projekteve të ardhshme në fushën e reduktimit të rreziqeve, adaptimit klimatik, menaxhimit të vullnetarëve, logjistikës dhe koordinimit të reagimit, si dhe për harmonizimin me qëllimet strategjike të Federatës Ndërkombëtare dhe standardet humanitare globale.