Mbështetje psiko-sociale për fëmijët e evakuuar nga përmbytjet në Kërçovë

Kryqi i Kuq i Republikës së Maqedonisë së Veriut përmes Qendrës për Shëndet Mendor dhe Mbështetje Psiko-Sociale, në koordinim me ekipe të trajnuara dhe vullnetarë për ndihmë të parë psikologjike, po realizon aktivitete për mbështetjen e fëmijëve të evakuuar pas përmbytjeve në Kërçovë.

Aktivitetet po zhvillohen në sallën sportive “Hristo Uzunov”, ku janë strehuar përkohësisht familjet e prekura. Në kuadër të “Këndit të Fëmijëve” të ngritur, sigurohet një mjedis i sigurt dhe mbështetës që u mundëson fëmijëve lojë, socializim dhe ndjenjë sigurie në kushte krize.

Përmes përmbajtjeve të strukturuara edukative dhe kreative – si vizatimi, punëtoritë në grup dhe aktivitete interaktive – ekipet profesionale ofrojnë mbështetje të gjithanshme psiko-sociale me qëllim uljen e stresit dhe lehtësimin e procesit të përballimit me pasojat e përmbytjeve. Këto aktivitete kontribuojnë në stabilizimin dhe forcimin e mirëqenies psikologjike, emocionale dhe sociale të fëmijëve.

Kryqi i Kuq mbetet i përkushtuar në ofrimin e ndihmës së vazhdueshme dhe të koordinuar për popullatën e prekur, me fokus të veçantë në kategoritë më të cenueshme, veçanërisht fëmijët.