Presidenti Pendarovski u takua me sekretarin e përgjithshëm të Kryqit të Kuq

Presidenti Stevo Pendarovski sot ka pritur një delegacion të Kryqit të Kuq të Maqedonisë së Veriut të kryesuar nga sekretari i përgjithshëm Sait Saiti. Në takim, siç njoftoi Kabineti i Pendarovskit, u paraqitën aktivitetet vijuese të Kryqit të Kuq, duke përfshirë edhe fushatën aktuale “Padituria jote kushton jetë”, e cila ka të bëjë me dhënien e ndihmës së parë gjatë aksidenteve rrugore dhe me të cilat do të përfshihen rreth 8.000 shoferë në të gjithë vendin. Presidenti Pendarovski e theksoi rëndësinë e veçantë të punës së Kryqit të Kuq, si organizatë e cila i kushtohet mbrojtjes së jetës dhe shëndetit të njerëzve, veçanërisht në rastin e aksidenteve dhe katastrofave. Sekretari i Përgjithshëm, Saiti e njohu presidentin Pendarovski edhe me aktivitetet e Kryqit të Kuq në Republikën e Maqedonisë së veriut për shënimin e 75-vjetorit të ekzistimit të tij në vitin 2020.