Vizitë pune në Gjysmëhënën e Kuqe Turke

Në periudhën 27–29 korrik 2026, me ftesë të Gjysmëhënës së Kuqe Turke, një delegacion i Kryqit të Kuq të Republikës së Maqedonisë së Veriut realizoi një vizitë zyrtare pune në Stamboll, Republika e Turqisë.

Vizita u organizua nga Drejtoria për Programet dhe Operacionet Ndërkombëtare e Gjysmëhënës së Kuqe Turke dhe kishte për qëllim forcimin e mëtejshëm të bashkëpunimit afatgjatë ndërmjet dy shoqatave kombëtare, shkëmbimin e përvojave dhe praktikave më të mira, si dhe shqyrtimin e mundësive për bashkëpunim të ardhshëm në fusha të ndryshme humanitare.

Gjatë vizitës, nikoqirët prezantuan strukturën organizative të sistemit të menaxhimit të fatkeqësive, mekanizmat e gatishmërisë dhe reagimit ndaj llojeve të ndryshme të situatave të krizës, si dhe rolin e Gjysmëhënës së Kuqe Turke në sistemin kombëtar të menaxhimit të rreziqeve dhe fatkeqësive.

Po ashtu, në kuadër të vizitës u vizitua edhe zyra e programit “Kızılaykart” për ndihmë në të holla. Përfaqësuesit e Gjysmëhënës së Kuqe Turke mbajtën një prezantim të detajuar mbi zbatimin e programeve të ndihmës në para dhe me kuponë, të cilat përbëjnë një nga mekanizmat më të rëndësishëm për ofrimin e mbështetjes humanitare për kategoritë më të cenueshme të popullsisë.

Në kuadër të vizitës u organizua edhe një ceremoni solemne me rastin e nënshkrimit të marrëveshjes për një projekt që do të zbatohet në Qendër Zhupë, i dedikuar për mbështetjen e personave të moshuar në kushte shtëpie. Me këtë u konfirmua edhe një herë angazhimi i përbashkët për avancimin e mëtejshëm të bashkëpunimit dhe realizimin e nismave të përbashkëta humanitare në periudhën e ardhshme.