Shënimi i Javës së Luftës kundër Tuberkulozit (14–21 shtator)

Kryqi i Kuq i Republikës së Maqedonisë së Veriut, në periudhën nga 14 deri më 21 shtator 2026, do të shënojë Javën e Luftës kundër Tuberkulozit. Në këtë mënyrë dëshirojmë të rrisim ndërgjegjësimin e publikut për rëndësinë e shëndetit të përgjithshëm, ndikimin social dhe ekonomik të tuberkulozit (TB), si dhe të nxisim përshpejtimin e përpjekjeve për t’i dhënë fund epidemisë globale të TB-së.

Tuberkulozi prek më së shumti të rriturit në moshën më produktive. Megjithatë, të gjitha grupmoshat janë të rrezikuara. Mbi 95% e rasteve dhe vdekjeve ndodhin në vendet në zhvillim. Në vitin 2024, rreth 10.7 milionë njerëz në mbarë botën u sëmurën nga tuberkulozi, ndërsa rreth 1.23 milionë persona humbën jetën si pasojë e kësaj sëmundjeje. Edhe në Maqedoninë e Veriut tuberkulozi mbetet një sfidë e rëndësishme e shëndetit publik, prandaj parandalimi i vazhdueshëm, njohja në kohë e simptomave, diagnostikimi i hershëm dhe trajtimi adekuat janë me rëndësi të veçantë.

Motoja e këtij viti për shënimin e Javës së Luftës kundër Tuberkulozit nga Kryqi i Kuq i Republikës së Maqedonisë së Veriut është: „Po! Ne mund t’i japim fund TB-së“. Organizatat komunale të Kryqit të Kuq dhe Kryqi i Kuq i Qytetit të Shkupit, në kuadër të Javës, do të ndajnë publikime në rrjetet sociale, do të organizojnë punëtori dhe shumë aktivitete të tjera promovuese me qëllim të rritjes së ndërgjegjësimit të publikut për parandalimin dhe diagnostikimin në kohë të tuberkulozit.