Национален младински камп за 2025 година

Националниот младински камп „100% Црвен крст“ се одржа од 18 до 24 јули 2025 година во Извидничкиот камп „Скаут“ во Струга. На кампот учествуваа 58 волонтери од 28 клубови на млади на општински организации на Црвен крст и Црвен крст на град Скопје. Кампот претставува интензивна и содржајна еднонеделна обука наменета за стекнување знаења и вештини поврзани со организирање и активирање на младите во клубовите на млади, подобро запознавање со структурата и активностите на Националното друштво. Посебен акцент беше ставен на планирање и спроведување на младински иницијативи на локално и национално ниво.

Во текот на кампот, секој ден се разработуваа различни тематски области поврзани со младинската работа, лидерството и активизмот. Учесниците имаа можност да се вклучат во сесии посветени на пристапот „млади за млади“, мапирање на потребите на младите, користење дигитални алатки за младинска промоција, вмрежување и мобилизација, развој на локално младинско работење, практична тимска работа, како и менталното здравје во клубовите на млади.

Кампот започна со свечено отворање, при што свои поздравни обраќања упатија Претседателот на Црвениот крст на РСМ, проф. д-р Ромел Велев, и Претседателката на млади, Александра Сандева. Во рамки на агендата на кампот, имаше и сесија на која присуствуваше Генералниот секретар на ЦКРСМ, д-р Саит Саити, кој со младите дискутираше за перспективите и можностите за унапредување на младинското делување на локално и национално ниво.

Во вечерните часови беа организирани тимски и забавни активности кои придонесоа за зајакнување на меѓусебната соработка, градење доверба и развој на тимски дух меѓу учесниците. Кампот придонесе кон зајакнување на капацитетите на младинските лидери, нивното меѓусебно вмрежување и инспирација за понатамошно активно делување во рамки на Црвениот крст.