Обука за воспоставување семејни врски / Служба Барање – основно ниво

Тренинг центарот Солферино во Струга, беше домаќин на обуката за воспоставување семејни врски / Служба Барање – основно ниво. Обуката се одржа во периодот од 06-08 април, 2026 година.

Цел на обуката беше запознавање на општинските организации на Црвениот крст во Република Северна Македонија со активностите, трендовите и предизвиците со кои се соочува Службата Барање во Црвениот крст на РСМ. Беа опфатени неколку теми: Историја на Службата Барање; правната рамка; услуги кои ги нуди Службата и кој може да има корист од нив; заштита на лични податоци; алатки за воспоставување семејни врски; превенција на раздвојување семејства; мрежата за воспоставување семејни врски во Репбулика Северна Македонија итн. Сите овие теми беа проследени со многу примери и практични вежби за поголемо приближување на темите до учесниците.

Главен предавач на обуката беше Иван Антониќ, одговорен за програмата Воспоставување семејни врски при Регионалната канцеларија на Меѓународниот Комитет на Црвен крст (ICRC) во Белград, кој во оваа пригода доби и благодарница од Црвениот крст на Република Северна Македонија за долгогодишната соработка и придонес кон остварувањето на целите на нашето национално друштво поврзани со Службата Барање.

Модератори и предавачи на обуката беа претставници на централната канцеларија на ЦКРСМ и ЦКГС, а активно учество на истата земаа секретари и вработени од општинските организации на Црвен крст Радовиш, Струмица, Неготино, Кичево, Гостивар, Куманово, Охрид, Прилеп, Струга, Крива Паланка, Велес, Тетово, Берово, Кавадарци, Кочани, Свети Николе, Битола, Штип, Центар, како и претставниците на мобилните тимови во Транзитните центри Винојуг и Табановце.