Претседателот на Собранието Африм Гаши во посета на Црвениот крст

На ден 14 август 2025 година, претседателот на Собранието на РСМ, Африм Гаши го посети Црвениот крст на Република Северна Македонија. Во рамки на посетата, тој оствари средба со генералниот секретар на Црвениот крст, Саит Саити.

Во рамки на посетата се разговараше за досегашната соработка, како и за можностите за нејзино понатамошно унапредување. За време на средбата беше отворено прашањето за иницирање на постапка за донесување нов Закон за волонтирање, со цел подобрување на условите и статусот на волонтерите во земјата. Дополнително, беше нагласена важноста од промовирање на Женевските конвенции и дополнителните протоколи. А по повод 5 Декември – Светскиот ден на волонтерството, беше предложено организирање волонтерска активност со учество на пратениците на Собранието на Република Северна Македонија.

Претседателот Гаши ја истакна важноста на улогата што Црвениот крст ја има во општеството, особено во време на кризи, како и потребата од институционална поддршка на организациите кои се посветени на хуманитарната работа.

Генералниот секретар Саити, пак, изрази благодарност за поддршката, нагласувајќи ја потребата од тесна соработка со сите релевантни општествени актери со цел обезбедување поефикасно и покоординирано делување на терен.