Размена на искуства за услугите наменети за лицата погодени од сиромаштија во Австрија

Од 09 до 12 јуни, во рамките на Проектот „Засилување на здравјето, пристапот, учеството и социјалната еднаквост во земјите на Западен Балкан“ финансиран од Австриското Федерално Министерство за труд, социјални работи, здравство, грижа и заштита на потрошувачите, имплементиран во соработка и поддршка на Австриски Црвен крст,  беше реализирана студиска посета во Австрија. Посетата беше реализирана од страна на претставници на Црвениот крст на РСМ, Црвен крст на град Скопје и Министерството за социјална политика, демографија и млади кои непосредно имплементираат програми за поддршка на лицата бездомници и лица изложени на социјален ризик од бездомништво. Посетата се реализираше во Виена со поддршка на претставници на Австрискиот Црвен крст  и имаше за цел учеснициите да се запознаат со функционирањето на различни институции кои работат со бездомници и лица во социјален ризик изложени на бездомништво.

Во текот на посетата, беа остварени средби со организации и установи кои нудат итна помош, сместување, психо-социјална поддршка, ресоцијализација и програми за реинтеграција нa лицата бездомници во општеството. Посебен акцент беше ставен на запознавање со австрискиот социјален систем, механизмите на финансирање, интерсекторската соработка и улогата на граѓанските организации во обезбедување на социјални услуги за бедомните лица.

Стекнатите искуства и знаења од оваа посета ќе придонесат за унапредување на постоечките програми и креирање на нови решенија за поддршка на ранливите категории во Република Северна Македонија, особено бездомници и оние изложени на ризик од социјална исклученост.