Саити му врачи јубилејно признание на градоначалникот на Виница

На 23 мај 2025 година, во Сината сала при Домот на култура „Тошо Арсов“ во Виница се одржа свечен настан по повод 80-годишнината од основањето на Црвениот крст на Република Северна Македонија. Настанот беше организиран во чест на долгогодишната хуманитарна мисија на оваа организација и нејзиниот непроценлив придонес во градењето на посолидарно и похумано општество.
Свеченоста ја посетија бројни гости, волонтери, претставници на локалните институции, како и граѓани кои со своето присуство ја искажаа својата поддршка кон активностите на Црвениот крст.
Пред присутните се обратија генералниот секретар на Црвениот крст на Република Северна Македонија, д-р Саит Саити, како и градоначалникот на Општина Виница, Миле Петков. Во своето обраќање, Саити ја нагласи значајната улога што ја имаат општините и нивните лидери во поддршката на хуманитарните активности, при што особено ја истакна успешната соработка со Општина Виница.
Како знак на благодарност за континуираната поддршка и посветеност кон хуманитарните цели, Саити му врачи јубилејно признание на градоначалникот Петков. Ова признание претставува симболично признание за заложбите на општината во промоцијата на хуманите вредности и обезбедувањето услови за непречено делување на Црвениот крст на локално ниво.
Во своето обраќање, градоначалникот Петков се заблагодари за признанието и ја потврди посветеноста на општината во натамошната поддршка на активностите на Црвениот крст. Тој подвлече дека партнерството меѓу локалната самоуправа и Црвен крст е клучно за благосостојбата на заедницата, особено во моменти на криза.
Говорниците ја истакнаа историската улога на Црвениот крст, почнувајќи од првите активности на организацијата па сè до современите предизвици со кои се соочува, како што се природните непогоди, епидемии и социјалната ранливост на одредени категории граѓани. Особено беше нагласена важноста на волонтеризмот и солидарноста, како суштински вредности врз кои се темели работата на Црвениот крст.