Светски ден на борба против туберкулоза

Црвениот крст на Република Северна Македонија согласно препораките на Меѓународната Федерација на Црвен крст и Црвена полумесечина се приклучува кон одбележувањето на 24 март – Светскиот ден на борба против туберкулозата. На овој начин сакаме да ја подигнеме јавната свест за важноста на општото здравје, социјалното и економско влијание на туберкулозата (ТБ) и да го поттикнеме забрзувањето на напорите за ставање крај на глобалната епидемија на ТБ.

Овогодинешното мото за Светскиот ден на борба против туберкулоза на Црвен крст на Република Северна Македонија е: „Да! Можеме да ставиме крај на ТБ“.

Туберкулозата и денес останува глобална епидемија, предизвикувајќи смрт на 1.300.000 луѓе секоја година. Појавата на туберкулоза отпорна на лекови претставува голема опасност по здравјето и ризик за придобивките стекнати во напорите да се стави крај на ТБ.

По повод одбележување на Светскиот ден на туберкулоза општинските организации на Црвен крст и Црвен крст на град Скопје ќе споделуваат информативни постери и едукативни објави на социјалните медиуми, како и други промотивно едукативни активности насочени кон подигнување на јавната свест за превенција, рано откривање и навремено лекување на туберкулозата.