Учество на Меѓународен младински камп на Австриски младински Црвен крст

Во периодот од 7 до 21 јули 2025 година во Лангенлоис, Австрија се одржа Меѓународен младински камп во организација на Австриски младински Црвен крст, во кој како претставник на Црвениот крст на Република Северна Македонија учествуваше волонтер од клубот на млади на Општинската организација Црвен крст Прилеп.

Под мотото „Ехо на промената – ПРИФАТИ ЈА РАЗЛИЧНОСТА, ОБЕДИНИ СЕ КАКО ЕДНО – НАШАТА ЗАЕДНИЧКА ПРИКАЗНА САМО ШТО ЗАПОЧНА! / Echo of Change – EMBRACE DIVERSITY, UNITE AS ONE – OUR JOURNEY TOGETHER HAS JUST BEGUN“, учесниците преку разновидни активности, дискусии и креативни работилници споделуваа визии, култури и хуманитарни вредности. На кампот учествуваа вкупно 29 млади од национални друштва на Црвениот крст и Црвената полумесечина од целиот свет.

Учесниците имаа можност да стекнат знаења и вештини од области како што се хуманитарното право, културната комуникација, менталното здравје, воспоставување семејни врски, реагирање при катастрофи, историјата и принципите на Движењето. Тие активно дискутираа за современи предизвици, соработуваа низ различни интерактивни пристапи и учествуваа на “World Fair” и “Festival of Nations”, каде на креативен и инспиративен начин ги претставија своите земји, култури и национални друштва.