Дополнителни регионални крводарителски акции

Летниот период традиционално носи намалување на бројот на крводарувања поради годишните одмори, патувањата и високите температури. Но, потребата од крв и крвни компоненти продолжува секојдневно.

Токму затоа, во периодот јули – септември 2026 година, Црвениот крст на Република Северна Македонија организираше пет дополнителни регионални летни крводарителски акции во Охрид, Скопје, Манастир „Св. Јован Бигорски“ и Крушево, со цел да се поттикне доброволното крводарување и да се придонесе кон одржување на стабилни резерви на крв во здравствениот систем во текот на летниот период.

Благодарение на заедничката мобилизација на крводарители од 23 општински организации на Црвениот крст, поддршката од волонтерите на Црвениот крст, како и спроведената промотивна кампања преку печатени и дигитални материјали, видео-содржини и соработка со инфлуенсери, беа собрани вкупно 363 дополнителни крвни единици.

Овој резултат е заеднички придонес на сите кои одвоија време, се пријавија и ја споделија својата хуманост преку крводарување.

Благодарност до сите крводарители, волонтери, Општински организации, партнери и поддржувачи кои придонесоа летните акции да бидат успешно реализирани.

Затоа што потребата од крв не познава сезона.

Дарувај крв. Спаси живот.