8-МИ МАЈ – СВЕТСКИ ДЕН НА ЦРВЕНИОТ КРСТ И ЦРВЕНАТА ПОЛУМЕСЕЧИНА

Секоја година Меѓународното Движење на Црвен крст и Црвена полумесечина го одбележува 8-мај Светскиот Ден на Црвен крст и Црвена полумесечина, во чест на Анри Динан, основоположникот на Движењето, кој е роден на 8 мај 1828 година. На овој ден националните друштва на Црвен крст и Црвена полумесечина ширум светот посебен акцент стават на значењето на основните принципи и вредности, оддавање признание за придонесот на членовите и волонтерите и искажување благодарност до партнерите за поддршката која ја обезбедуваат за Црвениот крст.  Во периодот од 8-15 Мај, Црвениот крст на РСМ традиционално ја одбележува и Неделата на Црвениот крст на РСМ со пригодни активности ширум државата.

Движењето на Црвениот крст и Црвена полумесечина првично се формирало за да им помогне на ранетите на бојното поле и да се воспостават хуманитарни стандарди во општеството. Со текот на годините, во Црвениот крст научивме да правиме многу други нешта во интерес на нашите сограѓани, се со цел да одговориме на современите предизвици и да понудиме помош и поддршка заедно со нашите партнери на луѓето на кои сме им потребни и кои го очекуваат тоа од Црвениот крст како една од најголемите хуманитарни организации во светот.

Посебно ни е драго што Црвениот крст на Република Северна Македонија кој годинава одбележува 8 децении од своето постоење, прерасна во современа неутрална и независна организација која дава посебен придонес во унапредување на социјално-хуманитарните и здравствено-превентивните  состојби на различни категории на население во државата. Нашето национално друштво  исто така дава посебен придонес во вршењето на помошна улога на властите во државата, пред се на полето на обезбедување на помош и поддршка на населението погодено од природни катастрофи и катастрофи предизвикани од човекот.

Годинава 8-Мај – Светскиот Ден на Црвениот крст и Црвена полумесечина во Движењето се одбележува под мотото “На страната на хуманоста” со цел да им оддадеме посебно признание на нашите волонтери и членство за нивната континуирана хуманитарна поддршка но и да укажеме на значењето на основните принципи, со посебен акцент на хуманоста како основа за нашата хуманитарна работа без која не би било можно да се реализираат останатите принципи.

Да се ​​биде хуман значи да се има срце полно со дух и желби да им се помогне на луѓето. Секој од нас игра важна улога во заедницата, за да биде попријатно место за живеење и делување. Секое наше добро дело претставува чин за поттик на нашите граѓани да ни се приклучат во нашата мисија за да им помагаме на луѓето кои се нашле во незавидна положба. Ве покануваме сите заедно да продолжиме да бидеме на страната на хуманоста во нашите напори да изградиме похумано општество во кое достоинството и добросостојбата на граѓаните ќе бидат најважни од се.

Им посакуваме честит 8-мај, Светски Ден на Црвениот крст и Црвена полумесечина на сите наши волонтери, членови и вработени и ги покануваме сите хумани луѓе да бидат дел од нашата хуманитарна приказна.