Црвен крст на РСМ потпиша меморандум со УСС при АУЕ – ФОН

Денес, 23 април 2026 година, во централната канцеларија на Црвениот крст на РСМ беше потпишан Меморандум за соработка помеѓу Универзитетското студентско собрание при Американскиот Универзитет на Европа – ФОН и Советот на млади на Црвениот крст на Република Северна Македонија.

Овој меморандум претставува значаен чекор кон продлабочување на соработката, особено во делот на активно вклучување на студентите во хуманитарни, едукативни и општествено одговорни иницијативи. Посебен акцент во договорот е ставен на формирањето и развојот на студентски клубови, кои ќе функционираат како платформа за директно учество на студентите во активностите на Црвениот крст.

Формирањето на студентските клубови се очекува да поттикне поголема мобилизација на младите во области како прва помош, крводарителство, ментално здравје, како и социјално-хуманитарни активности. Воедно, тие ќе бидат клучен двигател за ширење на хуманитарните вредности и подигнување на свеста за важни општествени прашања.

Со потпишувањето на меморандумот, двете страни ја потврдија својата заложба за континуирана соработка, размена на знаења и создавање можности за студентите активно да придонесуваат во заедницата. Овој чекор претставува силна основа за градење на поангажирана, одговорна и солидарна млада генерација.