Интервентна единица за одговор при катастрофи

Во рамки на проектот „Воспоставување на интервентен тим на Црвениот крст на Република Северна Македонија“, финансиран од Меѓународната федерација на Црвениот крст и Црвената полумесечина, во септември 2025 година беше реализирана обука со членовите на новоформираната Интервентна единица за одговор при катастрофи.

Единицата брои 45 членови, составена од професионалци и волонтери. Поради обемот на активностите и целта за ефикасна вклученост на сите учесници, обуката беше спроведена во три групи. Интервентната единица е организирана во повеќе тимови, со примарна задача да реагира во првите 72 часа по настанување на катастрофа.

Во текот на обуката, членовите на единицата поминаа низ следните тематски целини:

• Улогата на Црвениот крст во системот за управување со кризи во државата
• Оперативните сили на ЦКРСМ и нивната улога во одговор при катастрофи
• Брза проценка
• Безбедност во кризни ситуации
• Дисеминација и кодекс на однесување
• Комуникација и координација во кризни состојби
• Прва психолошка помош
• Научени лекции – Пожарот во Кочани

Со воспоставувањето на оваа полупрофесионална интервентна единица, Црвениот крст на Република Северна Македонија очекува значително зголемување на ефикасноста и подготвеноста за навремен и координиран одговор при идни катастрофи.