Министерот за здравство Азир Алиу во посета на Црвениот крст на РСМ

На 24 јуни 2025 година, министерот за здравство Азир Алиу оствари официјална посета на седиштето на Црвениот крст на Република Северна Македонија, каде што беше срдечно пречекан од генералниот секретар Саит Саити.

Во рамки на средбата, беа разгледани тековните и идните аспекти на соработката помеѓу Министерството за здравство и Црвениот крст, со особен акцент на зајакнување на партнерството во областа на јавното здравје, унапредување на превентивните здравствени програми, подобрување на механизмите за одговор при итни состојби, како и поддршка на ранливите категории на население.

По повод одбележување на значаен јубилеј на организацијата, генералниот секретар Саит Саити во знак на благодарност за континуираната институционална поддршка и успешна соработка, му врачи на Министерството за здравство јубилејна плакета. Признанието беше примено со благодарност од страна на министерот Алиу, кој ја истакна важноста на синергијата меѓу институционалните и хуманитарните капацитети во унапредувањето на здравствениот систем во државата.

Двете страни ја потврдија заложбата за натамошно унапредување на соработката преку заеднички проекти и активности насочени кон заштита и унапредување на јавното здравје и благосостојбата на граѓаните.