Настан за промоција на нова платформа на соработка меѓу Црвен крст и Универзитет Мајка Тереза

Денес, во просториите на Универзитетот „Мајка Тереза“ во Скопје, се одржа настан посветен на продлабочување на соработката меѓу Црвениот крст на Република Северна Македонија и академската заедница. Пред присутни студенти и професори, свечено беше доделена Јубилејната Плакета на Црвениот крст на РСМ на Универзитетот – признание за континуираната поддршка, промоција на хуманитарните вредности и ангажманот во развојот на волонтеризмот.

На настанот се обратија ректорот на Универзитетот Беким Фетаји и Генералниот секретар на Црвениот крст Саит Саити, кои ја истакнаа важноста на силните партнерства и активната улога на младите во хуманитарните процеси.

На панел дискусијата посветена на новата платформа за соработка меѓу Црвениот крст и универзитетите учествуваа Сузана Тунева Пауновска, секретар на Црвениот крст на Град Скопје; Магбуле Нуредини, студентка на студиската програма Социјална работа и социјална политика; проф. д-р Александар Петковски, декан на Правниот факултет и проф. д-р Фати Исени, проректор за образование. Панел дискусијата беше модерирана од страна на проф. д-р Фадби Османи.

Панелистите отворија значајни теми поврзани со улогата на академската заедница во развојот на хуманитарни иницијативи, размената на добри практики и создавањето нови можности за младите волонтери, со порака дека партнерствата помеѓу образовните институции и хуманитарните организации се клучни за градење поодговорно и похумано општество.