НОВ ЧЕКОР КОН ИНКЛУЗИВНА ЗАЕДНИЦА: КОЧАНИ ДОБИ ЦЕНТАР ЗА ДНЕВЕН ПРЕСТОЈ ЗА ЛИЦА СО ПОПРЕЧЕНОСТ

Денеска во Кочани свечено беше отворен Центарот за дневен престој за лица со попреченост – нова меѓуопштинска социјална услуга за корисници од Кочани, Чешиново-Облешево и Зрновци.

На свеченото отворање се обрати генералниот секретар на Црвениот крст на Република Северна Македонија, д-р Саит Саити, истакнувајќи го значењето на достапните, професионални и одржливи социјални услуги во заедницата.

Давател на услугата е Црвен крст на РСМ – Општинска организација Кочани, а Центарот има лиценциран капацитет за 12 корисници. Преку стручна и индивидуализирана поддршка, едукативни, рекреативни и социјални активности, корисниците ќе имаат можност да ги развиваат своите способности, да се социјализираат и поактивно да се вклучуваат во заедницата.

Центарот е воспоставен со поддршка на Министерството за социјална политика, демографија и млади и Светска банка, во партнерство со трите општини и Црвениот крст.

Уште еден конкретен чекор кон заедница со повеќе поддршка, еднакви можности и достоинство за секој човек.