ПЕР работилница

Во периодот од 27 до 29 октомври 2025 година, во центарот Солферино во Струга, се одржа работилница за ПЕР-Подготвеност за ефективен одговор при катастрофи на Црвениот крст на Република Северна Македонија со поддршка на Меѓународна федерација на Црвен крст и Црвена полумесечина.

Работилницата беше организирана со цел ревидирање и надградување на постојниот работен план во рамките на документот ПЕР, како и унапредување на капацитетите на организацијата за подготвеност и ефективен одговор при катастрофи и кризни ситуации на национално и локално ниво.

На работилницата учествуваа вработени од централната канцеларија на Црвениот крст на РСМ, како и претставници од општинските организации на Црвениот крст, кои активно придонесоа во анализата на постојните капацитети, идентификацијата на недостатоци и приоретизацијата на идни активности.

Фасилитатори беа претставници од Регионалната канцеларија на Меѓународната Федерација на друштва на Црвен крст и Црвена полумесечина и координаторот за катастрофи при Црвениот крст на РСМ. Работилницата беше спроведена на интерактивен, партиципативен и практично ориентиран начин, со комбинација од пленарни сесии и работа во тематски групи.

Како резултат на процесот, беше изготвена ПЕР-алатка според стандардниот шаблон на Меѓународната Федерација, со конкретни препораки и активности за унапредување на системот за подготвеност и одговор. Оваа алатка претставува клучен инструмент за националните друштва, овозможувајќи систематски пристап во проценката на капацитетите, поставување приоритети и планирање на долгорочни интервенции. ПЕР процесот не само што придонесува за зајакнување на оперативната подготвеност на организацијата, туку и создава основа за развивање на нови проектни иницијативи и партнерства со донатори, институции и други соработници.

Резултатите и приоритетите дефинирани преку оваа работилница ќе служат како основа за идентификација на идни програми и проекти во областа на намалување на ризици, климатска адаптација, волонтерски менаџмент, логистика и координација на одговорот, како и за усогласување со стратешките цели на Меѓународната Федерација и глобалните хуманитарни стандарди.