Поддршка и грижа за старите лица во домашни услови – два успешно реализирани циклуси на обуки

Проектот „Поддршка и грижа за старите лица во домашни услови“, кој се реализира во периодот јули–декември, се темели на едноставна, но значајна идеја: секое старо лице заслужува поддршка, внимание и достоинствена грижа во позната и безбедна средина – својот дом.

Со цел да се обезбеди квалитетна и сеопфатна грижа за 30 корисници од Центар Жупа, тимот ангажиран во проектот континуирано работи на унапредување на своите знаења и вештини преку специјализирани обуки.

На 20 и 21 јули беше реализирана почетната обука за оперативно работење, наменета за 10 волонтери, медицинска сестра, психолог и локален координатор. Учесниците се стекнаа со практични знаења за препознавање на потребите на старите лица, ефективна комуникација, организација на работата и тимска соработка. Посебно внимание беше посветено и на начинот на прибирање и евидентирање на потребните податоци, како и на можностите за мобилизирање на локалната заедница и создавање одржлив „круг на доверба и грижа“.

Обуките продолжија на 4 и 5 август со вториот циклус, посветен на унапредување на практичните вештини за обезбедување прва помош  и директна психо-социјална поддршка на терен. Преку обуката учесниците се запознаа со значењето на навремената и соодветна реакција, како и со ситуациите во кои е потребно да се пружи, односно да се избегне одреден вид помош.

Резултатите од двете обуки потврдија високо ниво на мотивација, посветеност и подготвеност на тимот за одговорно извршување на својата задача. Стекнатите знаења и вештини претставуваат важна основа за обезбедување квалитетна поддршка и грижа за старите лица во нивните домови.

Продолжуваме со хуманост, посветеност и грижа – чекор по чекор, за достоинствена и подобра старост на нашите сограѓани.