Психо-социјална поддршка за деца евакуирани од поплавите во Кичево

Црвен крст на Република Северна Македонија преку Центарот за ментално здравје и психо-социјална поддршка, во координација со обучени тимови и волонтери за прва психолошка помош, спроведува активности за поддршка на децата евакуирани по поплавите во Кичево.

Активностите се реализираат во спортската сала „Христо Узунов“, каде што привремено се сместени погодените семејства. Во рамки на воспоставеното „Детско катче“ се обезбедува безбедна и поттикнувачка средина што им овозможува на децата игра, дружење и чувство на сигурност во услови на криза.

Преку структуирани едукативни и креативни содржини – како цртање, групни работилници и интерактивни активности – стручните тимови обезбедуваат сеопфатна психо-социјална поддршка со цел намалување на стресот и олеснување на процесот на справување со последиците од поплавите. Овие активности придонесуваат за стабилизација и зајакнување на психолошката, емоционалната и социјалната благосостојба на децата.

Црвениот крст останува посветен на континуирана и координирана помош за погоденото население, со посебен фокус на најранливите категории, особено децата.