Работилница за тимска работа: меѓусебна поддршка во кризни ситуации и само-грижа на волонтерите и вработените на Црвен крст

Во периодот од 03 до 05 април 2026 година, Црвен крст на Република Северна Македонија, во рамки на Центарот за ментално здравје и психо-социјална поддршка, реализираше работилница на тема „Тимска работа: меѓусебна поддршка во кризни ситуации и само-грижа“, при што двајца психолози од Центарот беа ангажирани како предавачи.

На работилницата учествуваа вкупно 19 учесници – волонтери и вработени, кои активно беа вклучени во интервенции и давање поддршка за време на поплавите во Кичево, Охрид, Гостивар и Скопје.

Работилницата беше организирана како интерактивен процес, овозможувајќи им на учесниците да се психо-едуцираат за важноста на грижата за себе, да стекнат практични техники за справување со стрес во кризни ситуации на лично ниво, да научат пристапи за меѓусебна поддршка во тим при кризни интервенции, да ја разберат разликата помеѓу приватниот живот и ангажманот при кризни ситуации, како и да ги унапредат своите вештини за ефективна и вешта комуникација.

Посебен акцент беше ставен на искуствата на учесниците од терен, со цел зајакнување на нивната психолошка отпорност и подобрување на тимската координација при идни интервенции.

Работилницата е реализирана со поддршка на Меѓународна федерација на Црвен крст и Црвена полумесечина, во рамки на ДРЕФ операцијата „Поплави 2026“, насочена кон обезбедување навремена и квалитетна поддршка за погоденото население и зајакнување на капацитетите на тимовите на Црвениот крст.