Регионална средба по повод 10 години од постоењето на RIC/RFL платформата

Црвениот крст на Република Грција беше домаќин на регионалната средба по повод одбележувањето на 10 годишнината од постоењето на Регионалната информативна платформа за повторно обединување на семејства (RIC/RFL), која делува во рамките на Службата Барање при секое национално друштво на Црвен крст.

Настанот се одржа во Атина во периодот од 20-23 октомври, 2025 година, а ко-организатор беше Меѓународниот Комитет на Црвениот крст.(ICRC).

Нa настанот присуствуваа Генералните секретари на националните друштва на Црвен крст од регионот, меѓу кои и Генералниот секретар на Црвениот крст на Република Северна Македонија, д-р Саит Саити, како и претставниците на Службата Барање / Воспоставување семејни врски при националите друштва на Црвен крст од Грција, Северна Македонија, Србија, Црна Гора, Босна и Херцеговина, Хрватска, Словенија, Бугарија и Албанија.

Претседателот на Црвениот крст на Република Грција, г-н Антониос Авгеринос, свечено го отвори овој настан, нагласувајќи ја долгата и горда историја на Службата Барање.

Свое обраќање имаше и г-ѓа Јелена Стијачиќ, шеф на Регионалната Делегација на ICRC во Белград.

Главна тема на овој настан беше дискутирање на имплементацијата на RFL Стратегијата на Меѓународното Движење на Црвениот крст и Црвената полумесечина 2025 – 2030 година, како и миграциските предизвици во регионот и остварувањето на зацртаните заеднички цели. Акцент беше ставен на зајакнување на прекуграничната соработка, заштита на личните податоци и усвојување на одржливи хуманитарни практики со цел поефикасна Служба Барање.

Соработувајќи меѓусебе, продолжуваме да градиме мостови на солидарност и надеж, бидејќи секое семејство заслужува да биде повторно обединето.