Тренинг за тренери за психосоцијална поддршка и кризни интервенции на Црвен крст

Во текот на месец мај, Црвен крст започна со реализација на специјализиран тренинг за тренери од областа на психо-социјална поддршка (ПСП) и кризни интервенции. Програмата опфаќа 25 волонтери и вработени од организацијата, кои во иднина ќе спроведуваат обуки за институции и организации вклучени во системот за кризен менаџмент, како и за други релевантни институции и компании.

Тренингот се состои од 12 интерактивни работилници, секоја со времетраење од 3 часа, преку кои учесниците преку практична работа и лично искуство развиваат знаења и вештини за постапување во кризна состојба. Целта е создавање сертифицирани тренери кои ќе можат да обезбедуваат психосоцијална поддршка во кризни ситуации, да обучуваат други професионалци и волонтери, како и да управуваат со групи во високо-стресни околности. По завршувањето на обуката, учесниците ќе бидат оспособени да применуваат смирувачка комуникација во кризни ситуации, да препознаваат реакции на стрес и дезорганизација, да користат техники на активно слушање, валидирање и заземјување, да комуницираат на начин што не предизвикува дополнително вознемирување, да создаваат чувство на сигурност и стабилност кај лица во криза, како и да пренесуваат знаења на други волонтери и професионалци.

Овој тренинг претставува значаен чекор во унапредување на капацитетите за психосоцијална поддршка и кризен менаџмент во заедницата.