Учество на младински состанок во Солферино, Италија

Двајца претставници на младите од Црвениот крст на Република Северна Македонија учествуваа на Вториот состанок на младински лидери на Европската и Централноазиската младинска мрежа на Црвениот крст и Црвената полумесечина, кој се одржа во Солферино, Италија, во периодот од 24 до 28 јуни.

На состанокот се собраа млади лидери од националните друштва на Црвениот крст и Црвената полумесечина од Европа и Централна Азија, со цел размена на искуства, зајакнување на младинското учество во процесите на одлучување и подготовка за претстојните статутарни состаноци на Движењето.

Преку работилници, тематски сесии и дискусии, нашите претставници активно придонесоа во разговорите за младинските политики во Движењето на Црвениот крст и Црвената полумесечина, климатските промени, менталното здравје, хуманитарната дипломатија и зајакнувањето на младинското лидерство.

Во рамките на настанот, тие учествуваа и на традиционалната Fiaccolata – свечена поворка со факели низ Солферино, со која секоја година им се оддава почит на жртвите од Битката кај Солферино и се одбележува раѓањето на идејата за Меѓународното движење на Црвениот крст и Црвената полумесечина. Овој симболичен настан обединува илјадници волонтери и членови од целиот свет во духот на хуманоста, солидарноста и доброволството.