Извлекување на научени лекции за поефикасен одговор при идни катастрофи

Во периодот од 20 до 22 јули 2026 година, Црвениот крст на Република Северна Македонија со поддршка на Меѓународната федерација на Црвениот крст и Црвената полумесечина, ја одржа работилницата „Научени лекции“ во Центар Солферино во Струга, како завршна активност во рамките на ДРЕФ операцијата за поплавите во Кичево.

На работилницата учествуваа претставници од општинските организации на Црвениот крст од Кичево, Охрид, Гостивар и Црвен крст на град Скопје, кои беа директно вклучени во одговорот на поплавите.

Во согласност со практиката на Меѓународната федерација на Црвениот крст и Црвената полумесечина, по завршувањето на секоја ДРЕФ операција се организира процес за извлекување на научени лекции. Преку анализа на реализираните активности, размена на искуства и идентификување на добри практики и предизвици, се формулираат препораки кои придонесуваат за зајакнување на подготвеноста и капацитетите за поефикасен одговор при идни катастрофи.