Препораки за топлотните бранови

СИМПТОМИ И ЗНАЦИ НА СОСТОЈБИ ПРЕДИЗВИКАНИ ОД ВИСОКИ ТЕМПЕРАТУРИ

Топлотната исцрпеност претставува умерена, но потенцијално сериозна состојба која настанува поради продолжена изложеност на високи температури и губиток на течности и електролити.

Топлотниот удар претставува акутна, животозагрозувачка состојба и се смета за итна медицинска состојба. Најчесто настанува кога механизмите за терморегулација на организмот откажуваат.

Напомена

Секоја појава на нарушена свест, многу висока телесна температура или невролошки симптоми (конфузија, грчеви, губење на свест) се смета за сомнеж за топлотен удар и бара итна медицинска интервенција.

НАСОКИ ЗА ПОСТАПУВАЊЕ ПРИ СОСТОЈБИ ПОВРЗАНИ СО ИЗЛОЖЕНОСТ НА ВИСОКИ ТЕМПЕРАТУРИ

Со цел заштита на здравјето и безбедноста на лицата, при појава или сомнеж за состојби поврзани со изложеност на високи амбиентни температури (топлотен стрес, топлотна исцрпеност, топлотна синкопа и топлотен удар), задолжително е да се постапува согласно следните насоки до пристигнување на стручна медицинска помош (доколку има потреба):

1. Обезбедување на безбедност и прекин на изложеноста

• Веднаш да се прекине физичката активност.
• Лицето да се смести во ладна, засенчена, проветрена просторија или климатизирана просторија.
• Да се постави во лежечка положба, со благо подигнати долни екстремитети доколку нема сомнеж за повреда.

2. Разладување на телото

• Да се безбеди струење на воздух (природно или со вентилатор), со цел забрзување на испарувањето.
• Да се олабави или отстрани тесната и непотребна облека.
• Навлажнување на кожата со млака до ладна вода.
• Да се започне со постепено разладување со ладни облоги на врат, пазуви и препони.
• Да не се применуваат нагли или екстремни методи на разладување.

3. Хидратација

• Доколку лицето е свесно и комуникативно, да се даде вода или електролитен раствор, во мали и чести голтки.
• Да не се даваат течности кај лица со нарушена или изгубена свест.
• Да не се даваат алкохолни, енергетски или кофеински пијалаци.

4. Следење на виталните функции

• Да се следи степенот на свеснсот, ориентираност во простор и време, дишењето и општата состојба на лицето.
• При појава на конфузија, губење на свест, грчеви, силна главоболка или висока телесна температура, состојбата да се смета за итна здравствена состојба.

5. Повик на итна медицинска помош

• Во случаи на сомнеж за топлотен удар, како и при отсуство на подобрување по преземените мерки, без одложување да се повика итна медицинска помош.
• До пристигнување на здравствените служби да се продолжи со мерките за разладување.

6. Постапување при губење на свест

• Да се провери дишењето и проодноста на дишните патишта.
• Лицето да се постави во странична (бочна) положба.
• Да не се остава лицето без надзор до пристигнување на стручна помош.

Повеќе информации како да се заштитите од топлото време може да најдете и на следните линкови од Институтот за јавно здравје:

https://www.iph.mk/mk/news/index/1806 – Препораки за разладување на затворени простории при топло време

https://www.iph.mk/mk/news/index/1805 – Препораки за заштита на лицата над 65 години при високи температури

https://www.iph.mk/mk/news/index/1802 – Препораки за раководители на установите за згрижување стари лица и на центрите за долготрајна институционална грижа

https://www.iph.mk/mk/news/index/1799 – Внес на вода и физичка активност при топло време

https://www.iph.mk/mk/news/index/1798 – Заштита на доенчињата и децата при топло време

https://www.iph.mk/mk/news/index/1795 – Препораки за летни патувања

https://www.iph.mk/mk/news/index/1787 – Препораки за бремените жени при топло време