Учество на работилница “Ангажираност на заедницата при итни здравствени состојби” – Мапирање на структури во заедницата

Во периодот од 02-03 декември, представници од Црвен крст на РСМ зедоа учество на работилница со тема: “Ангажираност на заедницата при итни здравствени состојби” – Мапирање на структури во заедницата, организирана од страна на Регионалната канцеларија на Светската здравствена организација за Северна Македонија. На работилницата  учествуваа и представници од Министерство за здравство, граѓански организации, УНИЦЕФ, УНФПА, УСАИД и останати релевантни институции.

Целта на работилницата е да се зајакнат капацитетите во државата за вклученост на заедниците пред, за време и после итни здравствени состојби. Работилницата исто така има за цел да воспостави структури, системи и вештини за соработка помеѓу Министерството за здравство, Светска здравстена организација и граѓански организации, за вклучување на заедниците за подготвеност и одговор при итни здравствени состојби.

Заедниците играат клучна улога во справувањето со итни здравствени состојби, и е од суштинско значење да се изградат локални капацитети за брзо и ефективно справување со предизвиците што може да произлезат од вакви ситуации. Оваа работилница покрај тоа што ја зајакнува вклученоста на заедниците во здравствената подготвеност, истовремено и ја поттикнува солидарноста и довербата меѓу различни институции и организации кои работат на терен.