Заедничка работилница на претставници од Црвениот крст на РСМ и Норвешкиот Црвен крст

Во периодот од 10 до 12 октомври 2025 година, во Центарот за обуки „Солферино“ – Струга, се одржа заедничка работилница меѓу збратимените организации на Црвениот крст на Република Северна Македонија (Црвен крст на град Скопје, Општинска организација на Црвен крст Охрид) и Норвешкиот Црвен крст (Црвен крст Осло, Црвен крст Мор ог Ромсдал).

Работилницата собра 33 учесници, од кои 30 беа млади волонтери од двете земји, со цел размена на искуства и добри практики за унапредување на волонтерската работа и активностите насочени кон младите.

Фокусот на работните сесии беше насочен кон: Улична медијација и ненасилно решавање конфликти, со кои се занимаваа волонтерите од Скопје и Осло, Ментално здравје кај младите, тема обработена од тимовите на Охрид и Møre og Romsdal.

Покрај едукативниот дел, работилницата вклучи и културна програма, преку која учесниците имаа можност подобро да ја запознаат македонската култура и традиција: Организирана посета на градот Охрид со туристички водич, Традиционална македонска вечер со национални јадења и настап на фолклорното друштво „Драслајчанка“

Работилницата придонесе кон продлабочување на долгогодишната соработка помеѓу двете национални друштва, поттикнување на нови заеднички иницијативи и поставување темели за идни разменски програми во рамки на годишниот план за акција.

Овој настан е дел од билатералниот договор за соработка помеѓу Црвениот крст на Република Северна Македонија и Норвешкиот Црвен крст за периодот 2025–2027 година.