80 ГОДИШНИНА ОД ФОРМИРАЊЕТО НА ЦРВЕН КРСТ НА РЕПУБЛИКА СЕВЕРНА МАКЕДОНИЈА

80 ГОДИШНИНА ОД ФОРМИРАЊЕТО

НА ЦРВЕН КРСТ НА РЕПУБЛИКА СЕВЕРНА МАКЕДОНИЈА

Годинава, Црвениот крст на РСМ ја одбележува 80 годишнината од постоењето на нашата организација. Горди сме на нашите постигнувања, и секогаш подготвени да се справиме со новите предизвици кои значат обезбедување хуманитарна поддршка за луѓето кои се изложени на ризици и кризни состојби. Учиме од минатото и постигнувањата на плејадата волонтери и вработени кои низ текот на 80 години од нашето постоење континуирано даваа придонес за развојот на нашата организација и подобрување на животот на ранливото население во земјава и во светски рамки.

По повод 80-годишнината од своето формирање, Црвениот крст на РСМ ќе организира низа активности за одбележување на јубилејот за подигање на свеста за значењето на Црвениот крст во национални рамки како организација која е неуморен хуманитарен двигател за позитивни промени во општеството и постојан поборник за заштита на достоинството и добросостојбата на граѓаните на нашата земја. Покровител на одбележувањето на 80-годишниот јубилеј е Претседателот на Република Северна Македонија, г-ѓа Гордана Сиљановска-Давкова. На 18 март ќе се одржи свечена академија и пригодна изложба во Македонскиот Народен Театар на кој ќе присуствуваат повеќе меѓународни и домашни гости.

Големиот јубилеј ќе биде одбележан и со низа активности на локално и национално ниво како што се организирање на пригодни настани со преставници на сите локални самоуправи ширум државата и панел дискусии на сите универзитети во земјата на кои ќе стане збор за улогата и местото на Црвениот крст во општествени рамки и придонесот и учеството на сите општествени чинители во градење на силни локални заедници и моделирање на нови иницијативи и активности за обезбедување на комплементарен придонес во справување со најразлични предизвици во хуманитарната сфера.

Во текот на годината ќе бидат организирани и други настани во општинските организации на Црвен крст и Црвен крст на град Скопје под мотото “Ние гледаме луѓе” апострофирајќи ја основната заложба на нашата организација, да се грижиме за луѓето и да го штитиме човековото достоинство.

Ве покануваме да бидете дел од одбележувањето на нашиот осумдецениски јубилеј бидејќи нашите универзални вредности и приниципи отсекогаш се потпирале на придонесот и поддршката на нашите волонтери и поддржувачи кои се нашиот мост до крајните корисници на кои им е потребна нашата поддршка.