Одбележан 8 Мај – Светскиот ден на Црвен крст и Црвената полумесечина

На 8 Mај во Градскиот парк Школка во Скопје беше одбележан Светскиот ден на Црвен крст и Црвената полумесечина во чест на основоположникот на нашето Движење, Анри Динан кој е роден на 8 Mај 1828 година. По тој повод 192 национални друштва на Црвен крст и Црвена полумесечина низ светот организираат активности за да се потсетиме на значењето на основните принципи и вредности на Движењето и да искажеме благодарност и признание до сите наши волонтери и поддржувачи за поддршката која ја обезбедуваат за Црвениот крст. Почнувајќи од денес па до 15 мај традиционално се одбележува и Неделата на Црвениот крст на РСМ со низа активности ширум нашата државата.

Настанот го отвори Претседателот на Црвениот крст на РСМ, проф.д-р Ромел Велев кој истакна: „8 Мај – Светскиот ден на Црвениот крст и Црвена полумесечина го одбележуваме под мотото: Биди човечен. Сакаме луѓето да ги потсетиме на една од основните вредности, на значењето на љубезноста, на добрината, на човечноста, на сите оние мали и големи дела кои не прават луѓе и кои прават позитивна разлика во животот на луѓето на кои им е потребна поддршка.Не постои човек кој останува рамнодушен кога некој ќе му покаже љубезност и човечност но исто така секој од нас го исполнува прекрасно чувство кога прави нешто добро за луѓето околу нас.“

Црвениот крст на РСМ исто така изготви и поштенска марка која беше промовирана директорот на АД. Пошта на Северна Македонија Васко Стефанов и кој  изрази големо задоволство од досегашната заедничка соработка помеѓу овие две институции.

По повод 8 Мај од страна на Генералниот секретар на Црвениот крст д-р Саит Саити беше промовирана кампања на Црвениот крст за промоција на првата помош која ќе се спроведува под мотото “Првата помош спасува живот”. Во рамки на кампањата Црвениот крст ќе спроведe бесплатни обуки по прва помош со кои имаме за цел да опфатиме 25.000 ученици од основни и средни училишта. Истата ќе ја организираме преку нашите општински организации на Црвен крст во целата земја.

Генералнниот секретар на Црвениот крст додаде дека тоа е уште една наша дополнителна амбиција, како Црвен крст, чувствувајќи потреба за дополнително да придонесеме учениците соодветно да се справуваат со ризични ситуации и несреќи. Мислиме дека ќе помогнеме во подобрување на здравствената култура, покажувајќи на добар пример за другите.

На промоцијата на кампањата свое излагање имаше и Министерот за здравство, Д-р.Беким Сали кој истакна дека Министерството е поддржувач на обуката за учениците, опишувајќи го како значаен и хуман проект во кој ќе бидат вклучени  ученици.

Кампањата ја поддржува и министерството за образование и наука од каде државниот секретар на министерството м-р Анета Трпевска ја потенцираше досегашната соработка со Црвениот крст и преку оваа кампања ќе се подигне света кај учениците за почетната грижа за повреденото лице на самото место на несреќата.

Настанот беше од забавно – културен карактер предводен од водителите Сања Савеска и Марко Новески, збогатен со музички настапи, бендот 2Be, Агим Хајрулаху, Билјана Ѓошева, Аqua dance, хорот Поточиња, награден квиз, штандови за едукација за прва помош, рачни изработки од проектот „Хуманко“, цртање на деца од професионални детски шминки, уметничко изразување на децата, маскоти,аниматори и промотивен материјал.