ПРОМОЦИЈА НА ПЛАТФОРМА ЗА СОРАБОТКА НА ЦРВЕНИОТ КРСТ СО ВЛАСТИТЕ ВО ДРЖАВАТА

Денес на 06.11.2024 година Црвениот крст на РСМ организираше свечен настан во хотел Стоун Бриџ, Скопје за промоција на новата Платформа за соработка на Црвениот крст на РСМ со властите во државата.

Настанот се одржа под покровителство на Министерот за внатрешни работи на Владата, г.дин Панче Тошковски кој во воведното обраќање го апострофираше значењето на организацијата на Црвениот крст како вршител на помошната улога на властите во државата особено при итни состојби и катастрофи.

На настанот се обрати и г.дин Љупчо Димовски, Заменик Претседател на Владата и Министер за политички систем кој изрази подготвеност во името на Владата за поддршка на иницијативите на Црвениот крст за обезбедување на предуслови и поддршка за воспоставување на поефикасен систем за одговор на кризни состојби во државата.

За значењето на партнерската соработка со властите и Платформата на Црвениот крст на РСМ воведно обраќање имаше д-р Саит Саити, генерален секретар на Црвениот крст на РСМ кој нагласи неколку можни области на соработка  на Црвениот крст со властите во државата како сфери во кои Црвениот крст има компаративни предности и компетенции да даде своја додадена вредност на севкупните напори на државата во обезбедување на ефикасен одговор при кризни состојби и катастрофи.

Исто така, Проф. д-р Никола Дујовски од Факултетот за безбедност – Скопје подетално ја претстави севкупната содржина на Платформата и нејзиното значење во системот за кризен менаџмент од аспект на придонесот на Црвениот крст во повеќе клучни области.

На присутните им се обрати и генерал д-р Павле Арсоски, пратеник и Претседател на Комисијата за одбрана и безбедност кој особено го истакна значењето на организацијата на Црвениот крст во изминатите неколку децении давајќи краток осврт за улогата и придонесот на Црвениот крст во кризните состојби во овој период.

Свое кратко обраќање имаше и г.дин Габриеле Андреоли, почесен претседател на Институтот за напредни студии и соработка од Ватикан, кој искажа позитивни импресии од соработката со Црвениот крст на РСМ и значењето и придонесот на Црвениот крст во справувањето со хуманитарни предизвици во глобални рамки.

На настанот присуствува голем број пратеници од Собранието на РСМ, министри во Владата, претставници од универзитети ширум нашата земја, меѓународни организации и вработени и волонтери од Црвениот крст на РСМ.