Учество на Академија за волонтери во Варна, Република Бугарија

Во периодот од 02-09.09.2018 година во Варна, Република Бугарија се одржа 13та по ред Академија за волонтери организирана од младите на Бугарскиот Црвен крст.

Веќе 4 последователни години за време на Академијата, со поддршка на Регионалната канцеларија за Европа на Меѓународната Федерација на Црвен Крст и Црвена Полумесечина, младите на Бугарскиот Црвен крст покануваат интернационална група, составена од млади волонтери од различни Национални друштва од Европа и Централна Азија.

Оваа година учество на Академијата за волонтери зедоа млади од 12 Национални друштва и тоа: Хрватска, Холандија, Германија, Белгија, Босна и Херцеговина, Австрија, Швајцарија, Романија, Украина,Италија, Македонија и Бугарија. Претставници од редовите на младите на Црвен крст на Република Македонија беа Аленка Шопова и Билјана Јосифоска.

Во текот на Академијата на темата „Лидерство и комуникација“ предводена од двајца интернационални тренери, Марија Христова – член на Европски младински комитет за координација и Џузепе Касела – координатор за волонтерство за регионалната канцеларија на МФЦК во Европа, младите имаа можност да учат едни од други, да споделуваат позитивни практики и искуства во работењето со младите, да разменуваат идеи за подобрување и унапредување на волонтерството и да воспостават интернационални соработки.

Претставниците од сите Национални друштва на Црвен крст исто така имаа можност да ги претстават земјите од кои потекнуваат и карактеристичните активности и промотивни материјали на своите национални друштва. 

Учеството на оваа Академија за волонтери допридонесе многу за размена на искуства и идеи поврзани со младите на Црвениот крст, но и за учење и добивање на многу повеќе информации за овој модел за обука на младите волонтери, кој би можел да се имплементира и во нашето национално друштво.