Одбележување на Светскиот ден на волонтерството – 5 декември

Волонтерското дејствување е важен аспект од работата на Црвениот крст на Република Северна Македонија, и има континуиран развој во текот на постоењето на организацијата. Волонтирањето е клучно за нашиот организациски модел и ни овозможува директна и блиска врска со заедниците и социјално, развојно и хуманитарно дејствување. Затоа нашата организација прави посебни напори да го негува и промовира волонтерството.

По повод Светскиот ден на волонтерството, Црвениот крст на РСМ организираше пригоден настан на 3-ти декември  во хотел DoubleTree by Hilton Скопје со цел да се оддаде признание за придонесот на волонтерите на Црвен крст. Настанот беше одбележан под мотото “Хероите меѓу нас – Незапирливи” асоцирајќи на посебните напори на нашите волонтери кои делуваат понекогаш и во исклучителни околности обезбедувајќи поддршка и помош за различни целни групи погодени од итни состојби и ризици.

На настанот пригодно обраќање имаше Генералниот секретар на Црвениот крст на Република Северна Македонија, д-р Саит Саити кој зборуваше за значењето на волонтерството во државата и во Меѓународното Движење на Црвен крст и Црвена полумесечина а беше прочитана и порака од г.дин Стево Пендаровски, Претседател на Република Северна Македонија кој срдечно се заблагодари за придонесот на волонтерите на Црвениот крст.

По повод  Светскиот ден на волонтерството, Црвен крст на РСМ додели 11 Благодарници на волонтери на Црвениот крст на РСМ кои дале посебен придонес во реализацијата на целите и задачите на националното друштво во 2021 година. Благодарниците беа доделени од страна на г.ѓа Елизабета Ѓоргиеска, сопруга на Претседателот  на РСМ, г.дин Стево Пендаровски и генералниот секретар на Црвен крст на РСМ, д-р Саит Саити.

На настанот исто така имаше изложба на постери со мотиви од работата на волонтерите на Општинските организации Црвен крст и Црвен крст на град Скопје.

На 3-ти декември беа организирани различни активности и на општинските организации на Црвен крст и Црвен крст на град Скопје ширум државата со цел да се подигне свеста за значењето на волонтерскиот придонес во локалните заедници.