Ndihma humanitare për të përmbyturit në rajonin e Kërçovës

Kryqi i kuq i Republikës së Maqedonisë nëpërmjet Organizatës komunale të Kryqit të kuq Kërçovë, vazhdon ndihmën humanitare dhe mbështetjen për banorët e goditur nga shirat e rrëmbyeshëm. Situata në terren po ndiqet gjatë tërë kohës nga ana e vullnetarëve të Organizatës komunale Kërçovë dhe ajo tanimë është normalizuar.

Gjatë këtyre ditëve është ndarë ndihmë për gjithsej 139 familje, të cilave u janë përmbytur shtëpitë e tyre. Deri tani gjithsej janë distribuuar 208 pako ushqimore, 281 pako higjienike, 706 batanije, 100 shtretër, 1470 pjesë ushqimi në konserva, 206 çizme dhe këpucë, 206 xhaketa, 26 pampersa dhe pako higjienike për foshnja, 330 bukë dhe 834 litra ujë të pijshëm.