Дневни центри

Статистички податоци: Според пресметките и проекциите на Обединетите нации, секое десетто лице во светот е старо лице со возраст над 60 години. Според истите податоци, се очекува до 2050 година, секое петто лице да биде старо лице со возраст над 60 години. Во креирањето на сликата за старото население, воопшто не изостанува и Република Северна Македонија која од неодамна го помина прагот на демографската старост. Со 15% старо население над 60 години, на Пописот во 2002 година, Република Северна Македонија го надминува коефициентот на старо население од 12%. Според овие податоци, припаѓаме во земјите со висок степен на застапеност на старо население во севкупното население кое што живее во РСМ.

Црвениот крст на Република Северна Македонија преку имплементација на активности за грижа на старите лица, дава активен придонес во севкупните напори кои се преземаат во државата за подобрување на квалитетот на животот на старите лица во заедниците.

Од јуни 2011 година Црвениот крст на РСМ започна со имплементација на Проектот Грижа за стари лица во домашни услови, со поддршка на Австрискиот ЦК и Австриската агенција за развој. Целта на проектот е придонес во подобрувањето на условите за живот на ранливите стари лица и зајакнување на здравствениот и социјалниот систем на старите лица во Република Северна Македонија. Од 2013 година континуирана поддршка на активностите обезбедува ЕВН Македонија. Со Проектот се опфатени вкупно 360 стари лица постари од 65 години во Скопје, Велес, Крива Паланка, Кичево, Дебар и Струга, кои живеат сами и се изнемоштени. Тие добиваат поддршка од страна на тим составен од медицинска сестра и волонтер кои пружаат психо – социјални и здравствени услуги.

Во 2012 година отворен е Дневен центар за стари лица и центар за давање помош на стари лица во домашни услови со поддршка на Градот Скопје и Министерството за труд и социјална политика, кој функционира преку Црвениот крст на град Скопје. Во 2014 година отворен е уште еден дневен центар во соработка со општината Гази Баба, а од 2015 година со поддршка на Даути Фондацијата отворен е дневен центар и во Општина Сарај.

dom-za-stari-lica4

Локации на дневните центри за стари лица:

Дом на хуманитарни организации „Даре Џамбаз“;
Општинска организација на Црвен крст Чаир;
Старото кино во Маџари;
Основно училиште – Сарај

Корисниците во домашни услови ги добиваат следните услуги:

Мерење на шеќер во крвта;
Мерење на крвниот притисок;
Контакти со матичен лекар;
Совети за земање на терапија;
Совети за исхрана;
Придружба при одење на лекар и прошетка и сл.;
Разговори и различни активности за социјализација;
Храна и средства за хигиена;
Помош во купување на прехранбени продукти, лекови и сл.;
Вршење на административни работи, вадење на документи и сл.

Преку Општинските организации на Црвен крст Крива Паланка, Велес, Неготино и Прилеп функционираат Клубови за стари лица.

Преку дневните центри и клубовите се имплементираат активности за унапредување на квалитетот на животот, здравјето и психофизичката состојба на старите лица.

DSCN0824