8ми ПАРТНЕРСКИ СОСТАНОК НА ЦРВЕНИОТ КРСТ НА РЕПУБЛИКА МАКЕДОНИЈА

Денес, на 13.12.2017 година Црвениот крст на Рeпублика Македонија во своите простории го организираше 8ми-от Партнерски состанок. На состанокот присуствуваа генералниот секретар на Црвениот крст на Република Македонија, г-дин Саит Саити, министерот за локална самоуправа, г-дин Сухејл Фазлиу и претставници на корпоративниот сектор.

Партнерскиот состанок се организираше со цел да се промовираат хуманитарните вредности на Црвениот крст на Република Македонија за потикнување на стратешки партнерства за надминување на проблемите со кои се соочува населението во заедниците. Партнерскиот состанок се одржа под покровителство на Пивара Скопје, компанија која остварува соработка и поддршка на хуманитарните активности на Црвениот крст на Република Македонија.

Пред присутните се обрати генералниот секретар на Црвениот крст на Република Македонија, г-дин Саит Саити, кој истакна дека важноста на корпоративната подршка во Националното друштво е се позначајна и има тенденција да се зголемува, бидејќи корпоративниот сектор инвестира во програми за општествена одговорност и бара силни организации и брендови за партнер. Црвениот крст на Република Македонија има потенцијал да расте во оваа област, бидејќи можностите за партнерство кои ги задоволуваат овие параметри можат да се создадат за речиси сите теми и целни групи.

Свое обраќање на партнерскиот состанок имаше и министерот за локална самоуправа, г-дин Сухејл Фазлиу кој ја поздрави оваа иницијатива и го повика бизнис секторот и понатаму успешно да се вклучува во проектите на Црвениот крст на Република Македонија со цел подобрување на животот во заедниците.

Во склоп на настанот, Црвениот крст на Република Македонија додели признанија, “Сребрен поддржувач“ на Шпаркасе банка Македонија АД Скопје во знак на благодарност за поддршката во остварувањето на хуманитарните цели и задачи на Црвениот крст на Република Македонија и “Посебно признание“ на Прилепска пиварница АД Прилеп во знак на благодарност за поддршката во остварувањето на хуманитарните цели и задачи на Црвениот крст на Република Македонија.