Одбележување на Недела на борба против рак

Црвениот крст на Република Северна Македонија согласно календарот на традиционални активности во периодот од 01 до 08 март 2023 година ќе ја одбележи Неделата на борба против рак под мотото ‘‘Знаењето спасува живот,,.

Секоја година во светот заболуваат над 12 милиони луѓе од некој вид на малигни заболувања, а 7,6 милиони умираат како последица на болеста. Во Република Северна Македонија, секоја година се откриваат околу 6.000 нови случаи на заболени од рак. Овие бројки се навистина застрашувачки и алармантни. Експертите од Меѓународната унија за канцер и Светската здравствена организација нагласуваат дека приближно 40% од карциномите можат потенцијално да се спречат и ризикот од развој на малигни заболувања може значително да се намали со примена на едноставни превентивни мерки и промена на животните навики.

Општинските организации на Црвен крст и Црвен крст на град Скопје во рамките на Неделата ќе организираат едукативни работилници за различни целни групи и ќе споделуваат објави на социјалните мрежи со цел заеднички да придонесеме во подигање на јавната свест за важноста од превенција и навремено дијагностицирање на малигните заболувања. Со овие едукативни работилници ќе се опфати младата популација, ученици од средно училиште, како и повозрасна популација согласно полот и ризикот од појава на одреден вид на малигно заболување.