Одбележување на Недела на борба против шеќерна болест

Црвениот крст на Република Северна Македонија традиционално ја одбележува Неделата на борба против шеќерната болест (дијабет) од 10-16 октомври 2021 година под мотото “Здрав начин на живот и дијабетот”.

Дијабетот не е само зголемено количество на шеќер во крвта, тоа е хронична, исцрпувачка и скапа болест која го засега целото семејство. Се јавува како резултат на нездравиот животен стил кој подразбира лоша исхрана со конзумирање на брза храна и газирани пјалоци, намалена физичка активност и прекумерен стрес. Бројот на заболени се зголемува и затоа е неопходно да се прават превентивни прегледи и да се подигне свеста кај населението за ризик факторите за појава на дијабетот поврзани со исхраната, физичката неактивност, зголемена телесна тежина и стресот. 5-те златни правила за справување со оваа болест се : балансирана исхрана, физичка активност, самоконтрола на нивото на шеќер во крвта, едуцирање и употреба на лековите според упатствата.

Според податоците на Светска здравствена организација во 2018 година 9% од возрасното население над 18 години имале дијабет на светско ниво или околу 425 милиони лица. Дијабетот е директна причина за смрт кај 1,5 милиони лица, а до 2030 година се претпоставува  дека ќе биде седма причина за смрт во светот.

Во Република Северна Македонија има регистрирано околу 120.000 лица со дијабет тип 1 и тип 2, од кои 40.000 се на инсулинска терапија.

Во таа насока со цел да го дадеме нашиот придонес во континуирани напори за превенција на шеќерната болест, Општинските организации на Црвен крст и Црвен крст на град Скопје ќе преземат активности за подигнување на свеста од ризиците за појава на шеќерната болест преку спроведување на едукативни работилници кои ќе бидат организирани според  мерки за превенција од КОВИД -19 и преку он лајн едукации и споделувања на објави на социјалните мрежи.