СЕДНИЦА НА СОБРАНИЕТО НА ЦРВЕН КРСТ НА РЕПУБЛИКА МАКЕДОНИЈА

Собранието на Црвен крст на Република Македонија за мандатниот период 2012-2016 година, на 24 декември 2015 година во Домот на хуманитарни организации *Даре Џамбаз*, Скопје ја одржа осмата и последна седница за тековната година.

Годината која изминува е исполнета со одбележување на значајни јубилеји, настани датуми и активности. Во текот на седницата прикажани се кратки филмови за дел од значајните активности кои ја одбележаа годината.

Во холот на Домот Даре Џамбаз е поставена изложба за дел на клучни активности по повод 20 години од меѓународното признавање на Организацијата.

Во својот работен дел меѓу другото, Собранието расправаше за Програмата за работа и Буџетот на Црвениот крст на Република Македонија за 2016 година.

Генералниот секретар д-р Саит Саити се осврна на настаните кои ја карактеризираа 2015 година и ги презентираше овие документи како и идните насоки и приоритети кон кои ќе се движи Организацијата, преку интервјуто водено со новинарката Биљана Дебарлиева.

Од страна на присутните на седницата беа поставени прашања за идните активности на планот на волонтерското ангажирање, проектното работење и соработката со корпоративниот сектор како и за најактуените состојби со мигрантската криза.

Собранието едногласно ги донесе Програмата за работа на Црвениот крст на РМ за 2016, Буџетот на Црвен крст на РМ за 2016, Одлуката за извршување на Буџетот на Црвениот крст на РМ за 2016 година, Одлуката за овластување на Извршниот одбор на Црвениот крст на РМ да изврши ребаланс на Буџетот на Црвениот крст на РМ за 2016 година и Статутарната одлука за изменување и дополнување на Статутот на Црвениот крст на Република Македонија.

На крај, Претседателот на Црвениот крст на Република Македонија др.Милчо Трајков на членовите на Собранието им се заблагодари за нивниот придонес и им ги честита претстојните Новогодишни и Божиќни празници.