Среќен прв роденден КОПЧЕ!

На 16 мај 2019 година прославуваме точно една година од отворањето продавницата за половна облека Копче. Една цела година посветена на промоција на навики на одговорно трошење и донирање, на подигање на свеста за купување на облека од втора рака, за работно интегрирање на загрозени лица преку работилница за шиење и на многу други активности за создавање на подобри навики.

 Во текот на една година продавницата КОПЧЕ ја посетија вкупно 5244 посетители. Од нив вкупно 2181 се регистрирани како купувачи и тековно продадени се 6000 парчиња облека, обувки и други модни додатоци. Во продавницата се регистрирани донации од вкупно 1187 граѓани. Оваа година се собрани 30 тони облека која граѓаните ја донираа во Копче,во контејнерите за половна облека, магацинот на Црвен крст на град Скопје и од 20 компании, институции и организации кои ја поддржуваат иницијативата. Преку пунктот за бесплатно делење на облека се дистрибуирани вкупно 11141 парче на 935 лица од 186 семејства и во 10 институции каде се сместени лица во социјален ризик.

Сите овие активности во текот на целата година беа споделувани на официјалните фан страни на КОПЧЕ на Facebook и Instagram, каде имаме повеќе од 3603 следбеници и поддржувачи.