Тркалезна маса на тема * Миграциите нов предизвик на Службата за барање на исчезнати лица и воспоставување на семејни врски на Црвениот крст на Република Македонија*

Заеднички настап при решавањето на предизвиците

[responsive][/responsive]

Секој ден илјадници семејства се раздвоени како резултат на воени конфликти, природни катастрофи или миграции. Човечките страдања се огромни кога ќе се прекинат контактите со најблиските сакани личности и кога нема никакви информации за нивната судбина. Меѓународниот Комитет на Црвен крст и Националните друштва на Црвен крст и Црвена полумесечина, работат заедно секаде во светот да ги лоцираат ваквите случаи и да им помогнат на семејствата повторно да воспостават контакти.

Во контекст на Европскиот феномен на миграциите, кој се повеќе и повеќе добива на значење, а кој ја засега и нашата држава, Црвениот крст на Република Македонија на 25.11.2014 година, организираше Тркалезна маса на тема * Миграциите нов предизвик на Службата за барање на исчезнати лица и воспоставување на семејни врски на Црвениот крст на Република Македонија*, со цел подобро да ги претстави активностите на Службата за барање на Црвениот крст на Република Македонија.

Тркалезната маса беше иницирана заради заедничкиот интерес за позитивно решавање на проблемот со миграциите во Република Македонија. На настанот имаше можност да се разговара за феноменот на миграциите и можностите за заедничко делување на овој план во Република Македонија. Токму затоа на средбата беа поканети и зедоа учество претставници на Министерството за внатрешни работи, Центарот за азиланти, Транзитниот центар за мигранти, УНХЦР и невладини организации, со кои во моментов се обидуваме партнерски да одговориме на предизвикот со зголемениот број на мигранти во нашата држава и претставници на Регионалната канцеларија на Меѓународниот Комитет на Црвен крст во Белград, Црвениот крст на Србија и Црвениот крст на Бугарија, со кои се разменија искуства на овој план, со оглед на сличната ситуација со мигрантите во нивните држави.

Покрај активностите на Службата за барање, Црвениот крст на РМ, имаше можност да го претстави и реализирањето на проектите поврзани со миграциите, преку Одделот за миграции на Црвениот крст на РМ.

На крајот на средбата произлезе заклучокот дека ваквите иницијативи за заеднички настап при решавањето на предизвиците кои се од заеднички интерес, можат да доведат и до решавање на проблемите кои произлегуваат. Сите присутни ја истакнаа потребата од ваквиот начин на комуникација, за што се надеваме дека ќе премине во позитивна пракса.