Црвениот крст испрати хуманитарна помош за украинското население

Црвениот крст на РСМ денеска испрати камион со помош наменета за населението од подрачјата погодени од војната во Украина. Помошта се состои во 1200 пакети со храна и 400 пакети со хигиенски производи.

Ова е втора пратка хуманитарна помош за граѓаните во Украина, а пред неколку дена беше пратена помала количина помош во збирна пратка, а ова е една комплетна пратка. Претходно беа пратени 400 пакети со хигиена, значи вкупната помош која досега ја праќаме во Украина е 1200 пакети храна и 800 пакети со хигиена во вредност од 3.290.000 денари, обезбедена од граѓани, од компании, како и од резервите на Црвениот крст на РСМ изјави Генералниот секретар на Црвениот крст на РСМ д-р Саит Саити.

Црвениот крст исто така се грижи и за граѓани од Украина кои престојуваат во нашата земја. Засега се евидентирани 307 лица на кои претежно Црвениот крст се грижи за нивните основни потреби – облека, храна, средства за хигиена, здравствени услуги и изучување јазик.

Црвениот крст со свој потенцијал може да даде поддршка за лицата од Украина кои престојуваат во нашата земјава до крајот на летото. Исто така воведе и курсеви по македонски јазик за заинтересирани граѓани од Украина кои престојуваат тука. Досега се пријавени 37 од кои 20 деца и 17 возрасни. За време на летниот период се планира во една смена одмор и за децата од Украина во одморалиште во Струга.