ПОСЕТА НА ДЕЛЕГАЦИЈА НА ЦРВЕН КРСТ НА ХРВАТСКА ВО ЦРВЕН КРСТ НА МАКЕДОНИЈА

Во период од 20-24 октомври, 2016 година делегација на Црвениот крст на Република Хрватска во состав: д-р Јосип Јелиќ-претседател,Роберт Маркт – извршен претседател, Фрањо Грегуриќ и Јосипа Римац – потпретседатели на Црвениот крст на Република Хрватска,  оствари работна посета на Црвен крст на Р. Македонија. За време на престојот остварени се средби во централата на Црвениот крст на Р. Македонија со претседателот на националното друштво, Д-р Милчо Трајков и генералниот секретар, д-р. Саит Саити каде беше дискутирана соработката на двете национални друштва во изминатиот период со акцент на претстојните заеднички иницијативи и активности кои треба да се актуелизираат и превземат во блиска иднина.

Делегацијата, заедно со генералниот секретар на Црвениот крст на Р. Македонија, д.р- Саит Саити, го посетија и Црвениот крст на Република Македонија – Црвениот крст на град Скопје, пунктот за бездомници , логистичкиот центар на Црвениот крст на Р.Македонија, како и Црвениот крст на Република Македонија – општинска организација Охрид.

Во текот на меѓусебните разговори исто така стана збор и за тековните предизвици на двете национални друштва поврзано со мигрантската криза и ефективно справување со последниот бран на мигранти. Беше истакнато дека постои потреба од континуирана размена на информации и податоци за навремено излегување во пресрет на потребите на оваа целна група и ефективно обезбедување поддршка на властите во државата.

Претставниците на двете национални друштва дискутираа и заклучија дека е потребно воспоставување поблиска соработка помеѓу двете национални друштва.